Juventus ទុក​ពេល​ឲ្យ Depay ត្រឹម​ចុង​សប្តាហ៍​នេះ មុន​ពេល​ក្លឹប​បង្វែរ​ទៅ​គោលដៅ​ថ្មី

ក្លឹប​សេះ​បង្កង់ Juventus បាន​ដាក់​ពេលវេលា​កំហិត​សម្រាប់​កីឡាករ Memphis Depay ពោល​ត្រូវ​តែ​សម្រេច​គ្រប់​យ៉ាង​ឲ្យ​បាន​ត្រឹម​ចុង​សប្តាហ៍​នេះ មិន​ដូច្នោះ​ទេ ក្លឹប​នឹង​ដក​ខ្លួន​ចេញ ហើយ​បង្វែរ​ទៅ​ចរចា​គោលដៅ​ថ្មី​ហើយ។

ជា​ការ​ពិត​សេះ​បង្កង់ ចង់​នាំ​យក​ខ្សែ​ប្រយុទ្ធ​ហូឡង់ នៅ​លក្ខខណ្ឌ​ឥត​តម្លៃ​ខ្លួន ពោល​ចង់​ឲ្យ​កីឡាករ​ទៅ​រំអុក​ក្លឹប​អាណាព្យាបាល​បញ្ចប់​កុងត្រា​របស់​គេ មុន​ការ​ផុត​កំណត់​មួយ​ឆ្នាំ។ មាន​ន័យ​ថា Juventus នឹង​ព្រម​យក Depay ក្នុង​ករណី​កីឡាករ​ក្លាយ​ជា Free Agent ប៉ុណ្ណោះ ដូច្នេះ​ Barcelona បើ​ចង់​សម្រាល​បន្ទុក​ចំណាយ​ថ្លៃ​ពលកម្ម ម្ល៉េះ​ត្រូវ​ហ៊ាន​ខាត​លើ​ប្រាក់​ផ្ទេរ​ចូល។ នេះ​បើ​តាម​សារព័ត៌មាន SPORT បាន​ចុះ​ផ្សាយ។

ប្រសិន​ជា​ក្នុង​ករណី Depay មិន​អាច​ដោះស្រាយ​បញ្ហា​រវាង​ក្លឹប Barcelona លើ​ការ​បញ្ចប់​កុងត្រា​ត្រឹម​ចុង​សប្តាហ៍​នេះ​បាន​ទេ នោះ​ក្លឹប​ដឹកនាំ​ដោយ​អ្នកចាត់ការ​លោក Massimiliano Allegri ក៏​នឹង​បង្វែរ​រ៉ាដា​ទៅ​ចរចា​កីឡាករ Marko Arnautovic របស់​ក្លឹប Bologna វិញ ពោល​សម្រុក​ចង់​បាន​ខ្សែ​ប្រយុទ្ធ​ប្រអប់ មុន​ការ​បិទ​ទីផ្សារ​ដោះដូរ​នា​ថ្ងៃ​ទី ៣១ ​សីហា។ ក្រៅ​តែ​ពី Juventus ក៏​ល្ហិចល្ហៀង​មាន​ក្លឹប Man Utd ចាប់​អារម្មណ៍​លើ​កីឡាករ​អូទ្រីស​ខាង​លើ​ដូច​គ្នា៕ព័ត៌មានកីឡាបាល់ទាត់ថ្មីៗ