Lewandowski ដល់​ពេល​ហើយ រដូវ​កាល​នេះ Barcelona នឹង​ឈ្នះ​ពាន​រង្វាន់

Robert Lewandowski បាន​បង្ហាញ​ការ​ជឿជាក់ ទៅ​កាន់​អ្នក​គាំទ្រ​ថា​ក្លឹប Barcelona នឹង​ដល់​ពេលវេលា​លើក​ពាន​រង្វាន់​ជា​ថ្មី​ហើយ បន្ទាប់​ពី​រដូវ​កាល​ចាស់​ខកខាន​ការ​ឈ្នះ​សូម្បី​តែ​មួយ។ ខ្សែ​ប្រយុទ្ធ​សញ្ជាតិ​ប៉ូឡូញ បាន​មក​ចុះចូល​នៅ​អ្នក​មាន​បុណ្យ​កាល​ពី​ខែ​មុន និង​កំពុង​ក្លាយ​ជា​ចំណែក​សំខាន់​ជួរ​មុខ ក្រោម​ការ​ដឹកនាំ​របស់​លោក Xavi Hernandez។

ផ្តល់​បទសម្ភាសន៍​ជាមួយ LaLiga World ខ្សែ​ប្រយុទ្ធ​ប្រអប់​វ័យ ៣៤ ឆ្នាំ​និយាយ៖ “ពេល​ទទួល​ដំណឹង​ដំបូង ខ្ញុំ​បាន​ចាប់​អារម្មណ៍​ភ្លាម​ជាមួយ Barcelona ដោយ​ខ្ញុំ​គិត​ថា វា​ជា​ពេល​ល្អ​បំផុត​សម្រាប់​ខ្ញុំ និង​ក្លឹប​ផ្ទាល់ ហើយ​នៅ Bundesliga ក៏​ខ្ញុំ​មាន​អារម្មណ៍​ល្អ​ដែរ​ពេល​នោះ តែ​ខ្ញុំ​អត់​ចង់​ឈរ​ជើង​មួយ​អាជីព​នៅ​លីគ​តែ​មួយ​ទេ ដូច្នេះ​ហើយ​ក៏​គិត​ថា​វា​ដល់​ពេល ក្នុង​ការ​បោះ​ជំហាន​ទៅ​កាន់​អាជីព​ថ្មី”។

លោក​បន្ត៖ “ខ្ញុំ​ត្រៀម​ខ្លួន​រួចរាល់​ហើយ វា​តែងតែ​ជា​ក្តីស្រមៃ​ក្នុង​ការ​លេង​នៅ La Liga ខ្ញុំ​ពិត​ជា​រីករាយ​នៅ​ទី​នេះ ហើយ​យើង​ក៏​បាន​ខកខាន​ការ​ឈ្នះ​ពាន​រង្វាន់ ដោយ​ជឿ​ថា​បញ្ចប់​រដូវ​កាល​នេះ នឹង​មាន​រឿង​ល្អ​សម្រាប់​អ្នក​គាំទ្រ វា​ដល់​ពេល​ហើយ ជា​ពេល​សក្តិសម​បំផុត​សម្រាប់ Barcelona ក្នុង​ការ​ឈ្នះ​ពាន​ជា​ថ្មី”។

គួរ​បញ្ជាក់​ថា នៅ​រដូវ​កាល ២០២២/២៣ សម្រាប់ Barcelona ក៏​មាន​កៅអី​លេង​ពាន​អឺរ៉ុប UEFA Champions League ផង​ដែរ ហើយ​ក្លឹប​ដែល​ពួក​គេ​នឹង​ជួប​នៅ​វគ្គ​ចែក​ពូល ជា​ក្លឹប​ណា​ខ្លះ នឹង​ត្រូវ​បាន​ប្រកាស​នា​ព្រឹត្តិការណ៍​ចាប់ឆ្នោត នៅ​សប្តាហ៍​ក្រោយ។ រំឭក​កាល​ពី​រដូវ​កាល​មុន អ្នក​មាន​បុណ្យ​ធ្លាក់​ត្រឹម​វគ្គ​ចែក​ពូល៕ព័ត៌មានកីឡាបាល់ទាត់ថ្មីៗ