PSG ​ចង់​លក់ Neymar ហើយ​ប្តូរ​យក​កីឡាករ​រូប​នេះ

PSG ​ចង់​លក់ Neymar ហើយ​ប្តូរ​យក​កីឡាករ​រូប​នេះ តែ​ខាង​ក្លឹប​អាណាព្យាបាល​បដិសេធ

ក្លឹប​ Paris Saint-Germain ក៏​បាន​ដាក់​សំណើ​សាក​សួរ​ក្លឹប​នៅ​ឯ​អង់គ្លេស​ផង​ដែរ អំពី​ការ​ចង់​លក់ Neymar Jr ជា​ថ្នូរ​ប្តូរ​យក​កីឡាករ​សំខាន់ និង​លុយ​មួយ​ចំនួន តែ​ខាង​ក្លឹប​អាណាព្យាបាល​បាន​បដិសេធ មិន​ចាប់​អារម្មណ៍​ការ​ចរចា​ឡើយ។ នេះ​បើ​តាម​សារព័ត៌មាន Le Parisien បាន​ចុះ​ផ្សាយ។

ក្លឹប​សេដ្ឋី​បារាំង បាន​ទាក់ទង​ទៅ​កាន់​ក្លឹប​មេឃ​ខៀវ Manchester City ដោយ​ចង់​បាន​កីឡាករ Bernardo Silva នឹង​ប្រាក់​មួយ​ចំនួន​បន្ថែម តែ​ខាង​ក្លឹប​ម្ចាស់ដី Etihad មិន​យល់​ព្រម ក៏​ជា​ហេតុ​នាំ​ឲ្យ Neymar នៅ​បន្ត​ឈរ​ជើង ឲ្យ​ក្លឹប​មាន​មូលដ្ឋាន​ក្នុង​ទីក្រុង​ប៉ារីស​ដដែល សម្រាប់​រដូវ​កាល​ថ្មី​ខាង​មុខ។

ជា​ការ​ពិត​កីឡាករ​ប្រេស៊ីល​បាន​ស្ថិត​នៅ​ PSG តាំង​ពី​ឆ្នាំ ២០១៧ តែ​ពេល​ចុង​ក្រោយ​មិន​សូវ​ធ្វើ​បាន​ល្អ​ឡើយ​លើ​ទីលាន។ បុរស​វ័យ ៣០ ឆ្នាំ សេសសល់​កុងត្រា​ដល់​ចុង​ខែ​មិថុនា ឆ្នាំ ២០២៥ តែ​យ៉ាង​ណា​ក្លឹប​ PSG ហាក់​ចង់​បន្ថយ​ទំហំ​ចំណាយ​ថ្លៃ​ពលកម្ម​ក្រាស់ក្រែល ទើប​សម្រេច​ចិត្ត​លក់​មួយ​ក្នុង​ចំណោម​តារា​ជួរ​មុខ​ទាំង ៣ ហើយ​ម្នាក់​នោះ​គឺ Neymar។

យ៉ាង​ណា​មេឃ​ខៀវ ​បាន​បណ្តុះ​យក​បាន​យុវជន​ល្អៗ​ដូច​ជា Erling Haaland, Julian Alvarez និង Kalvin Phillips រួច​ទៅ​ហើយ ជា​ហេតុ​នាំ​ឲ្យ​ក្លឹប​មិន​ចាប់​អារម្មណ៍​ការ​នាំ​យក​អ្នក​ថ្មី ក៏​ដូច​ជា​ទាមទារ​ការ​ចំណាយ​ច្រើន ទៅ​លើ​កីឡាករ​វ័យ​ចំណាស់​ខាង​លើ។ រំឭក​ថា ការ​ប្រកួត​ជុំ​ដំបូង​របស់​ក្រុម​លោក Pep Guardiola នៅ PL កំណត់​ត្រូវ​ជួប West Ham នា​ថ្ងៃ​ទី ៧ សីហា៕ព័ត៌មានកីឡាបាល់ទាត់ថ្មីៗ