កីឡាករ ១៣ រូប ធ្វើ​ឲ្យ​អ្នក​គាំទ្រ Real Madrid សោកសៅ​បំផុត

ឆ្លង​ផុត​រយៈ​ពេល​ជិត ១០ ឆ្នាំ​មក​នេះ បើ​យើង​ងាក​ទៅ​ក្លឹប​ Real Madrid គឺ​បាន​ឈ្នះ​ពាន​អឺរ៉ុប Champions League ដល់​ទៅ ៤ សម័យ​កាល ហើយ​អ្នក​គាំទ្រ​មាន​ការ​សាទរ​ខ្លាំង នៅ​សម័យ​កាល Hat-trick UCL ឬ​ការ​ឈ្នះ ៣ រដូវ​កាល​ជាប់ៗ​គ្នា ក្រោម​ចំណាត់ការ​ដឹកនាំ​របស់​លោក Zinedine Zidane។

យ៉ាង​ណា​ហែល​ពេល​វេលា​ជិត ១ ទសវត្ស ​ក្លឹប Real Madrid ក៏​បាន​បាត់បង់​នូវ​កីឡាករ​ល្អៗ​ជា​បន្តបន្ទាប់ ហើយ​ក៏​បាន​យក​មក​វិញ​នូវ​ចំណូល​ថ្មី​ពោរពេញ​ដោយ​គុណភាព និង​ខ្លះ​កំពុង​ស្ថិត​ក្រោម​ការ​ដុស​ខាត់ មុន​យុគសម័យ​នៃ​ឈុត​ចាស់ ត្រូវ​ឈាន​ដល់​ទី​បញ្ចប់។ រាប់​តាំង​ពី​ឆ្នាំ ២០១៣ CTS SPORT បង្ហាញ​ការ​ចាកចេញ របស់​កីឡាករ​ ១៣ រូប ធ្វើ​ឲ្យ​អ្នក​គាំទ្រ​នឹក​ស្រណោះ​បំផុត។

ឆ្នាំ ២០១៣ ការ​ចាកចេញ​របស់ Mesut Ozil – បន្ទាប់​ឈរ​ជើង​បាន ៣ ឆ្នាំ​ឲ្យ​ក្លឹប​អធិរាជ​ស កីឡាករ​អាល្លឺម៉ង់ ក៏​បង្កើត​ផល​ចំណេញ​លើស ១ ទ្វេ​ជា ២ ផ្ទេរ​ទៅ​ក្លឹប​អង់គ្លេស Arsenal តែ​ក៏​បាន​បន្សល់​ស្ថិតិ​ដ៏​គួរ​ឲ្យ​ស្ងើច​សរសើរ ពោល ១៥៩ ប្រកួត រក​បាន​ ២៧ គ្រាប់ និង Assist ដល់ ៨០ លើក។

ឆ្នាំ ២០១៤ ការ​ចាកចេញ​របស់ Di Maria និង Xabi Alonso – រំលង​ទៅ​មួយ​ឆ្នាំ​បន្ទាប់ ក្រោយ​ឈ្នះ​ពាន UCLរដូវ​កាល ២០១៣/១៤ ក្លឹប​ស្ថិត​ក្នុង​ទីក្រុង Madrid ក៏​បាត់បង់​ខ្សែ​ប្រយុទ្ធ​ស្លាប និង​បម្រើ​ការពារ​ទាំង​ពីរ​រូប ជា​ថ្នូរ​នឹង​ទឹក​ប្រាក់​ចូល​ហោប៉ៅ ៨៤ លាន​អឺរ៉ូ។

ឆ្នាំ ២០១៥ ការ​ចាកចេញ​របស់ Iker Casillas – បើ​រាប់​ក្រោយ​ឆ្នាំ ២០១០ អាច​និយាយ​ថា Casillas ជា​អ្នកចាំទី​ដ៏​ល្អ​បំផុត​របស់​ក្លឹប ហើយ​វា​ក៏​ជា​ការ​បាត់បង់​ Legend ដ៏​ធំ​បំផុត​មួយ​ផង​ដែរ ដ្បិត​អី​កីឡាករ​អេស្ប៉ាញ​បាន​ចាយ​ពេល​ជិត ២០ ឆ្នាំ រាប់​ទាំង​ការ​ឈរ​ជើង​នៅ​ឈុត​ថ្នាល។ ពេល​នោះ Casillas បាន​ផ្លាស់​ទៅ Porto នៅ​លក្ខខណ្ឌ​ផ្ទេរ​ឥត​តម្លៃ​ខ្លួន ក៏​ជា​ក្លឹប​ចុង​ក្រោយ​មុន​ចូល​និវត្ត។

ឆ្នាំ ២០១៧ ការ​ចាកចេញ​របស់ Pepe – អតីត​ប្រធាន​ក្រុម ក៏​ជា​កីឡាករ​លេច​កាច​របស់ Real Madrid បាន​ផ្លាស់​ទៅ​ក្លឹប​ទួរគី Besiktas នៅ​ឆ្នាំ ២០១៧ ពោល​ក្រោយ​ការ​ចាយ​ពេល​អស់ ១ ទសវត្ស។ ពេល​នោះ អ្នក​គាំទ្រ​មាន​ការ​សោកស្តាយ​ខ្លាំង ព្រោះ​តារា​ឆ្នើម​ព័រទុយហ្គាល់ ពិត​ជា​មាន​គុណភាព​ល្អ នៅ​តំណែង​ការពារ​កណ្ដាល។

២០១៨ ការ​ចាកចេញ​របស់ Cristiano Ronaldo – ក្រោយ​បញ្ចប់​ការ​លើក​ពាន UCL ទី ៤ ជាមួយ​អធិរាជ​ស Ronaldo ក៏​ស្រាប់​បង្កើត​ការ​សម្រេច​ចិត្ត​ដ៏​ភ្ញាក់ផ្អើល ជាមួយ​ការ​ផ្ទេរ​ទៅ​ក្លឹប Juventus នៅ​តម្លៃ​បំបែក​កំណត់ត្រា ១១៧ លាន​អឺរ៉ូ។ ខណៈ​នោះ បាន​ធ្វើ​ឲ្យ​អ្នក​គាំទ្រ​មាន​ការ​ខឹងសម្បា​ជា​ខ្លាំង​ទៅ​លើ​ប្រធាន​ក្លឹប លោក Florentino Perez ហើយ​ខ្លះ ក៏​នៅ​រក្សា​កូន​ចិត្ត​សោកស្តាយ​មក​ទល់​សព្វថ្ងៃ។

២០១៩ ការ​ចាកចេញ​របស់ Keylor Navas – បន្ទាប់​យក​បាន Thibaut Courtois ក៏​នាំ​ឲ្យ​ Navas មើល​ឃើញ​ថា​វត្តមាន​របស់​ខ្លួន​លែង​សំខាន់ ហើយ​ក៏​ចាកចេញ​នៅ​មួយ​ឆ្នាំ​បន្ទាប់។ តែ​យ៉ាង​ណា បុរស​សញ្ជាតិ​កូស្តារីកា​ក៏​បាន​បន្សល់​ការ​នឹករលឹក​ច្រើន ពី​អ្នក​គាំទ្រ​ Madrid ផង​ដែរ ព្រោះ​បាន​ចំណែក​បុរស​ម្នាក់​នេះ​ហើយ ជួយ​ឲ្យ​ក្លឹប​ឈ្នះ​ពាន UCL ៣ សម័យ​កាល​ជាប់​គ្នា។

២០២១ ការ​ចាកចេញ​របស់ Raphael Varane និង Sergio Ramos – ខ្សែ​ការពារ​កណ្ដាល​មួយ​គូ បាន​ចាកចេញ​ព្រម​គ្នា​នៅ​ឆ្នាំ​តែ​មួយ ហើយ​ម្នាក់​ផ្លាស់​ទៅ​ PSG ម្នាក់​ទៀត​ផ្លាស់​ទៅ​ក្លឹប Man Utd។ ពួក​គេ​សុទ្ធ​សឹង​ជា​កីឡាករ​កាន់​ឆ្នាំ តែ​ក៏​ជឿ​ថា ឥឡូវ​ប្រហែល​អ្នក​គាំទ្រ​រៀន​សម្រប​ចិត្ត​បាន​បណ្តើរៗ​ហើយ ក្រោយ​មាន​ដៃ​គូ​ថ្មី David Alaba និង Eder Militao ក៏​ធ្វើ​បាន​ល្អ​ដែរ​នោះ។

២០២២ ការ​ចាកចេញ​របស់ Gareth Bale, Isco, Marcelo និង Casemiro – អ្នក​ទាំង​បួន ក៏​មិន​ខុស​ពី​កីឡាករ​មុនៗ ពោល​សុទ្ធ​សឹង​ធ្លាប់​ជា​ចំណែក​សំខាន់ នៅ​ការ​ឈ្នះ​ពាន​អឺរ៉ុប។ មក​ទល់​ពេល​នេះ ៣ រូប​រក​បាន​ទ្រនំ​ឈរ​ជើង ដូច Bale ទៅ Los Angeles, Isco ទៅ Sevilla និង Casemiro ទៅ Man Utd នៅ​ឡើយ​តែ Marcelo តែលតោល​មិន​ទាន់​រក​បាន​ក្លឹប​ជ្រកកោន។

ចុះ​អ្នក​បន្ទាប់​អាច​ជា​តារា​ឆ្នើម​រូប​ណា ថា​មិន​ត្រូវ​ ២០២៣ អាច​ជា​ការ​ចែក​ផ្លូវ​របស់ Luka Modric, Toni Kroos, Karim Benzema ឬ Dani Carvajal ក៏​ថា​បាន៕ព័ត៌មានកីឡាបាល់ទាត់ថ្មីៗ